Plattdeutsche Nachrichten
... und bin über die plattdeutschen Nachrichten gestolpert. Ein Blick ins Programmschema verrät aber, daß es sich hierbei um ein Bonbon handelt; die übrigen Nachrichten waren dann auch alle auf hochdeutsch.
Machen die anderen Landesprogramme das auch?
Ich finde das super. Dürfte gerne auch noch etwas öfter sein (nur nicht ständig). Zum einen, weil mir diese Mundart gefällt, zum anderen, weil das Radio so auch etwas Ursprüngliches, etwas Althergebrachtes bewahrt. Gibt es Angaben zur Resonanz von Hörern? Es wäre auch interessant, zu erfahren, ob dieses Modell in anderen Gegenden auch funktionieren könnte.
Das funktioniert seit Jahrzehnten auch auf Bremen Eins - jeweils MO bis FR punkt halbig ölben. Hier die Ausgabe vom 10.06.2009:
Böhrnsen beduert Insolvenz vun Arcandor
Bremen – De Börgermeester vun de Stadt, Böhrnsen, beduert de Insolvenz vun Arcandor. Böhrnsen sä to Radio Bremen, dat weer woll beter wesen un Bund, Eegner un Gläubiger harrn all tosamen versöökt, Karstadt to redden. Bremens Finanzsenatorsche Linnert sä dargegen, de Insolvenzandrag weer de richtige Weg. Se hoopt aver, dat dat Koophuus in de Obernstraat blieven ward. Op een Bedreevsversammeln hebbt güstern abend de Karstadt-Mitarbeiters Eenzelheeten to de Insolvenz vun Arcandor to weten kreegen.
Weg free för Fiat bi Chrysler
Washington – De Autoboer Fiat draff den Kunzern Chrysler nu doch övernehmen. Dat hett de Boverste Gerichtshoff in Washington entscheeden. Dat Gericht wiest darmit den Andrag vun een paar Pensionsfonds trüch, de Övernahme noch to stoppen. Fiat hett darmit draut, sik trüchtotrecken, wenn dat Instiegen bi den US-Autokunzern Chrysler nich bit to'n 15. Junimaand klaar is.
Tarifverhanneln för Kinnergaarns geiht an'n Mondag wieter
Bremen – In'n Tarifstriet bi de Gemeende-Kinnergaarns wüllt se an'n Mondag wieter verhanneln. Vördem hebbt de Arbeitgevers een nejet Anbott vörleggt. In Bremen un Neddersassen blifft ok hüüt wedder veele Gemeende- un Stadt-Kinnergaarns dicht. In Bremen geiht dat üm 12, in Bremerhaben üm 7 Kinnergaarns. Dat schall aver mehr Notgruppen geven, üm Öllern, de arbeiten doot, to entlasten.
Twee Dode nah Mallör in'n Kreis Deefholt
Schwarm – Bi een Mallör in'n Straatenverkehr in'n Kreis Deefholt sünd hüüt Morrn twee Minschen üm't Leven kamen, een anner is swar an't Liev to Schaden kamen. Twüschen Schwarm un Martfeld sünd twee Autos tosamen stött. De Polizei ermiddelt opstunns, woso dat to dat Mallör kamen is.
Gaststäe in Hilligenrode afbrannt
Hilligenrode – Een Traditschons-Gaststäe in de Gemeende Stuhr is in de Nacht daalbrannt. De Polizei taxeert den Schaden op tominnst een half Million Euro. Minschen sünd darbi nich an't Liev to Schaden kamen. Dat hunnert Jahr ole Traditschons-Gasthuus "Klosterhof" harr vör twee Maand sien Bedreev instellt. Gegen Klock twee weer dat Füer utbrooken, woso dat passeert is, wüllt de Brand-Ermiddler hüüt noch rutkreegen.
Dat Weer
Un nu een Blick op dat Weer:
in Leer 12, an'n Bremer Fleegerhaben un in Bremervöör 13, un an de Fischereehabenslüüs in Bremerhaben sünd dat opstunns 14 Grad. Hüüt sünd to'n Deel Wulken an'n Heben, to'n Deel is dat aver ok fründlich un meist dröög. Verenkelte Regenschuer sünd aver wieter mögelk bi een Schangs op Regen vun 30 Perzent. Bi 16 bit 18 Grad weiht de Wind mit Maten bit frisch ut Südwest bit West – in de Nöögde vun Schuern weiht dat ok mit dullen Boijen. In den tweeten Deel vun de tokamen Nacht treckt dichte Wulken op un dat regent meist orrig dull. Bi 12 bit 10 Grad weiht de Wind swack un dreiht vun Nord op Ost. Morrn regent dat erst, an'n Nahmiddag klaart dat kort op, denn regent dat aver wieter bi 16 Grad.
Quelle: radiobremen.de
Wer mag - sogar als Podcast erhältlich:
http://www.radiobremen.de/bremeneins/podcast/podcast132.html